تحدث الفنان أحمد آدم عن هوس الترند، الذي أصاب الناس في الآونة الأخيرة، فتحول وسيلة سهلة وفعالة للدخول إلى عالم الشهرة، من أوسع أبوابها، وضرب المثل بـ تامر حسني وقال أحمد آدم خلال برنامجه «آدم شو»، المذاع عبر قناة الحياة: «زمان لما كنت تحب تكون نفسك، كنت تطلع السعودية تطلع العراق، لكن دلوقتي عشان تكون نفسك يقولك اطلع ترند».

وتابع أحمد هجومه على من يتخذون الترند وسيلة للشهرة، وتطرق في كلامه للفنان تامر حسني حيث قال: «عايز تمثل هتمثل، عايزتغني هتغني، عايز تلم فلوس على الجهاز هتلم، المهم تركب الترند، وإنك تعمل ترند ده مش موضوع صعب، مثلا لو حد سألني على تامر حسني، هقول يا سلام تامر حسني اول ما طلع قولنا يومين وهيخلص، بس الحمدلله الراجل مكمل زي الفل وبيعمل عظمة».

وقال أحمد آدم إذا كان رد نفس الشخص، يحمل هجوما سيتحول ترند: «مش كفاية كدا على تامر حسني، هما شويتين وخلصوا، أول لما طلع فتح القميص، وعمل شوية أغاني تعبانة وإسفاف، والأفلام اللي بيعملها وحشة جدًا، ايه اللي يجيبوا لأنور وجدي دا».

علق تامر حسني على تصريحات أحمد آدم عبر صفحته على انستجرام: «أستاذ احمد آدم فعلاً بيدي درس حقيقي بيشرح فيه، سمات العصر الحالي اللي كلمة تريند فيه جننت عقول بعض الناس، و خليتهم يبيعوا مبادئهم و صداقتهم و امانتهم لمجرد ان الناس تعرفهم، او تتكلم عليهم و لو ليوم واحد و نسيوا انه لا يصح الا الصحيح، عشان ده عدل ربنا و اي افاقين مع الوقت هتلاقيهم، بيختفوا و المحترم الحقيقي هو اللي بيستمر اصل لما نهتم، و نرد على كل كداب امال اللي بيحبونا نعمل معاهم ايه؟».

وأضاف تامر حسني: «تابعوا قلوب الناس و المواقع اللي هتاخد كلام، الاستاذ احمد السلبي و ينشروه و علموا عليهم عشان تعرفوا حقيقتهم، و الحقيقه ان فعلاً الكلام السلبي هو اللي انتشر، شكراً استاذ احمد آدم لكلامك و اشادتك الحقيقيه في حقي هي شهاده عظيمه من فنان محترم و كبير بفنه و اخلاقه».